Эп пӗртак чӑваш ятне çӗклесшӗн,

                                                                                           Ман юман пек пулса кашламалла,

                                                                                           Хунавран эп тивӗç пиçӗхмешкӗн,

                                                                                           Малалла-ха пурнӑç, малалла.

                                                                                                                   (Петӗр Хусанкай)

            Чӑваш халӑх поэчӗ Петр Петрович Хусанкай (Казанков) 1907 çулхи кӑрлачӑн 22-мӗшӗнче Тутарстанри Элкел районӗнчи Сиктӗрме ялӗнче çуралнӑ. Вӑл поэт кӑна мар. Çав вӑхӑтрах тӑлмачӑ та, чӗлхеçӗ те, публицист та, историк та, этнограф та, критик та, лирик та пулнӑ. Унӑн сӑввисемпе поэмисене пӗлмен, вуламан чӑваш çук та пулӗ. «Аптраман тавраш» сӑвӑлла роман, «Магнит ту», «Таня» тата «Тӑван çӗршыв» поэмӑсем, «Хура пӗркенчӗк», «Кӑнтӑр кĕввисем», «Тилли юррисем», «Инçе вӗçев» сӑвӑ ярӑмӗсем чӑваш литературин пуянлӑхӗ. Хусанкай çырнисенче чӑваш çӗр-шывӗпе унӑн çыннисен кун-çулӗ, халӑх кӑмӑлӗ яр уççӑн курӑнать.

            Тӗнче литературинче сумлӑ ят хӑварнӑ поэт çуралнӑранпа 2017 çулхи кӑрлач уйӑхӗн 22-мӗшӗнче çӗр вунӑ çул çитрӗ. Вилĕмсĕр поэта  чысласа кăрлач уйăхĕн 25-мĕшĕнче Тĕрлемесри пĕтĕмĕшле пĕлÿ паракан вăтам шкулта 7-8-мĕш классемпе „Нумай енлĕ талантлă поэт“ литература сехечĕ иртрĕ. Семёнова П.А. чăваш чĕлхипе литературине вĕрентекен, çыравçăн пурнăçĕпе пултарулăхĕ тăрăх хатĕрленĕ презентаципе паллаштарчĕ, викторина ирттерчĕ. Ачасем Петĕр Хусанкай сăввисене пăхмасăр вуларĕç, унăн хайлавĕсене аса илчĕç. Шкул библиотекарĕ Белова Е.Н. çыравçăн кĕнекисемпе паллаштарчĕ.

            Петĕр Хусанкай – чăваш поэзийĕн чи çутă çăлтăрĕ. Унăн ятне чăваш халăхĕ пысăка хурса хисеплет, яланах асра тытать.