Мĕнле хитре чăваш тĕрри,

                                                                          Ун курăнмасть вĕçĕ-хĕрри.

                                                                           Унта асамлă çăлкуçсем,

                                                                           Илемлĕ çутă çăлтăрсем;

                                                                           Мĕнле пуян чăваш тĕрри, -

                                                                          Унта пин-пин çулсен йĕрри.

                                                                                         В. Давыдов-Анатри

     Чăвашсен ку тарана çити упраннă пуянлăхĕ тата тĕлĕнтермĕшĕ вăл – чĕлхе, юрă, тĕрĕ,- тенĕ И.Я. Яковлев.Чÿк уйăхĕн 26-мĕшĕ – Чăваш тĕррин кунĕ. Ăна Чăваш Республикин Пуçлăхĕ О.А. Николаев хушăвĕпе уявлама йышăннă. Шăпах çак кун тĕрĕ ăсти Екатерина Ефремова çуралнă. Чăваш тĕррин уявне ăна хисеплесе çак кун паллă тума тытăннă.Тĕрĕ вăл – чăвашсен чи авалхи искусствисенчен пĕри. Чăваш тĕррин илемĕ такам чунне те тыткăнлать. Пичченпе тÿнтерне уйăрса илмелле мар ик енчен те тирпейлĕ çĕвĕсем, тĕссен çураçăвĕ куçа илĕртет. Çак куна халалласа Тĕрлемесри пĕтĕмĕшле пĕлÿ паракан вăтам шкулта та тĕрлĕ мероприяти иртрĕ. Уроксенче „Чăваш çĕрĕн çĕр пин тĕрĕ“ калаçу иртрĕ, „Чăваш тĕрри-илем тĕнчи“ курав йĕркелерĕç, ачасем чăваш тĕрри-эрешĕ çинчен çырнă кĕнекесемпе паллашрĕç, тĕрĕ-эреш ÿкерчĕç. Вĕренекенсем чăваш тĕрри çинчен нумай çĕннине пĕлчĕç. Хамăрăн çакăн пек пуянлăха пĕтме парас марччĕ, ăна упраса хăварасчĕ.